Глобалната пандемија на Ковид-19 е вид катастрофа чии ефекти ќе траат долго во иднина, нагласи генералниот директор на Светската здравствена организација (СЗО), Тедрос Аданом Гебрејесус.
„Пандемијата е здравствена криза што се јавува еднаш во сто години и влијанијата ќе траат со децении“, рече Гебрејесус на состанокот на Комисијата за итни случаи на СЗО, според извештаите објавени од организацијата.
Пандемијата досега однесе над 670.000 човечки животи по нејзиното избувнување во Вухан, а дијагностицирани се повеќе од 17 милиони заразени лица.
„Иако знаењето за новиот вирус напредуваше, многу прашања остануваат неодговорени и популацијата останува ранлива. Првичните резултати од серолошко истражување даваат конзистентна слика: најголем дел од светската популација останува подложна на вирусот, дури и во области што се сериозно погодени од заразата“, порача првиот човек на СЗО.
„Многу земји што веруваа дека најлошото заврши, сега се соочуваат со ново ширење на инфекцијата. Некои земји што беа сериозно погодени во последните неколку недели, сега бележат зголемување на бројот на инфекции и смртни случаи“, додаде Гебрејесус.