Поранешниот кинески министер за правда Танг Јиџун денеска е осуден на доживотен затвор за поткуп, објави државната телевизија CCTV, пренесува Ројтерс.
Судот во Сјамен, во југоисточната покраина Фуџијан, соопшти дека Танг нелегално примил имот во вредност од повеќе од 137 милиони јуани (19,71 милиони долари) помеѓу 2006 и 2022 година и ја злоупотребил својата позиција за да добие корист од субјекти и поединци во области како што се котирање на компании, аквизиција на земјиште, банкарски кредити и водење судски случаи.
Дејствијата на Танг претставуваат кривично дело „поткуп“, се вели во пресудата на судот, додавајќи дека износите биле „особено големи и предизвикале „особено сериозни загуби“ за интересите на државата и народот.
На Танг му беа одземени и политичките права доживотно, а целиот негов личен имот е конфискуван, објави CCTV .
Неговата казна дојде во време кога кинескиот претседател Си Џинпинг започна широка антикорупциска кампања. Кинеската антикорупциска агенција соопшти во текот на викендот дека започнала истрага против Ванг Сјангси, министерот за управување со вонредни состојби, во редок случај на истрага против актуелен министер.
Танг, 64, ја започна својата кариера во источната покраина Џеџијанг каде што помина три децении и се искачи на функцијата заменик-шеф на покраинската Комунистичка партија. Подоцна беше гувернер на покраината Љаонинг пред да биде назначен за министер за правда во 2020 година.
Танг беше под истрага во април 2024 година за сериозни дисциплински и законски прекршоци, термин што обично се користи за случаи на корупција. Подоцна истата година беше исклучен од Комунистичката партија.