Мечот против Порто на „Драгао“ во осминафиналето во Лигата на шампиони беше последен за Еузебио ди Франческо на клупата на Рома. Раководството на „волчицата“ реагираше експресно и веднаш по враќање на екипата од Португалија му врачи отказ на тренерот. Заклучокот е повеќе од јасен – исцрпени се сите кредити и римјаните немаат перспектива со членот на генерацијата која во 2001 година освои „Скудето“.
Еузебио ди Франческо го презеде кормилото на Рома на почетокот на јуни во 2017 година и најголем успех на тимот под негово водство беше пласманот во полуфинале во ЛШ во минатата сезона. Во тековната, пак, во Серија А заостанува во голема мера зад Јувентус, пред неа е Наполи како и двата милански клуба, а во врат ` дишат Лацио, Аталанта и Торино, но, сепак, е конкурентна за наредното издание на ЛШ.
Понижувачкиот пораз од Фиорентина со 1:7 во Серија А беше почеток на крајот за Ди Франческо чија замена на „Олимпико“, според италијанските медиуми, ќе биде Клаудио Раниери кој неодамна доби отказ во Фулам.