Родителите можат да работат од дома без временско ограничување, без да бараат дозвола од нивните работодавaчи, додека нивните деца не наполнат осум години.
Португалија им забрани на шефовите да испраќаат текстуални и електронски пораки до работниците надвор од работното време, како дел од новиот правен пакет популарно наречен „право на одмор“, јави Би-Би-Си.
Одлуката е дел од законските измени донесени за балансирање на приватниот и професионалниот живот, особено во однос на фактот дека многу работници работат од дома.
Компаниите со повеќе од 10 вработени може да се соочат со казна доколку контактираат со вработените надвор од времето наведено во нивните договори за работа. Донесени се и нови правила за далечинско работење на работниците со деца. Родителите можат да работат од дома без временско ограничување, без да бараат дозвола од нивните работодавaчи, додека нивните деца не наполнат осум години.
Компаниите, исто така, би можеле да бидат принудени да платат дел од трошоците за работа од дома, на пример за трошоци за струја или интернет. Со оглед на тоа што работниците може да доживеат чувство на изолација, од компаниите се очекува да организираат редовни физички состаноци.
Сепак, некои елементи од правниот пакет не беа прифатени во португалскиот Парламент, вклучително и „правото на исклучување“ што би им овозможило на работниците да ги исклучуваат сите уреди по работното време. Португалската министерка за труд и социјална заштита, Ана Мендес Годињо, на конференција во Лисабон минатата недела рече дека работата на далечина менува многу работи и оти нејзиниот раст мора да се регулира. Таа се надева дека подобрата заштита на работниците исто така ќе привлече многу странци да дојдат да работат во Португалија, велејќи дека ја смета нејзината земја „едно од најдобрите места во светот за дигитални номади и работници од далечина“.