Португалската влада ја одобри продажбата на лондонскиот фудбалски клуб Челзи, кој е во сопственост на Роман Абрамович, руски бизнисмен и приврзаник на Кремљ.
Абрамович е под санкции на британската влада и неговиот имот е замрзнат. Тој го стави клубот на продажба на почетокот на март по руската инвазија на Украина, велејќи во тоа време дека тоа е „во најдобар интерес на клубот“. Абрамович има португалско државјанство и поради санкциите, владата во Лисабон требаше да ја одобри продажбата.
„Португалското овластување е резултат на гаранцијата дадена од британските власти дека средствата од продажбата ќе се користат за хуманитарни цели, без директна или индиректна корист на сопственикот на клубот, кој е на списокот на санкции на Европската унија“, се вели во соопштението на владата.
Владата на Велика Британија веќе ја дозволи продажбата, што ќе стави крај на речиси две децении на Абрамович како сопственик на клубот. Завчера и англиската Премиер лига објави дека нејзиниот одбор ја одобрил продажбата на клубот.
Договорот, вреден повеќе од 5 милијарди долари, ќе доведе до контрола над клубот од новиот сопственик Тод Боели. Боели е познат по инвестиции во спортски франшизи, вклучително и удели во Лос Анџелес Доџерс од МЛБ, Лос Анџелес Лејкерс од НБА и Лос Анџелес Спаркс од ВНБА.