Судијката Дијана Груевска Илиевска која го води процесот за Поткуп, даде два часа пауза откако одбраната на лидерот на СДСМ, Зоран Заев, кој е обвинет за примање поткуп како градоначалник на Струмица, побара изземање и на обвинителот Златко Биковски кој во меѓувреме дојде во Судот за да го замени Владимир Милошевски за кого адвокатите претходно бараа изземање од случајот „Поткуп“, поради изминат мандат.
Според одбраната ниту Биковски не може да го застапува обвинението бидејќи е дел, од како што велат „злосторничко здружение кое монтирало политички процес против лидерот на опозицијата, а исто така бил обвинител и во случајот „Пуч“.
Адвокатите побараа рок од три дена за да го комплетираат барањето, но судијката Дијана Груевска – Илиевска им даде само два часа пауза за надлежен обвинител од обвинителството за организиран криминал и корупција да се изјасни барањето.
На почетокот на судењето одбраната на Заев побара изземање на обвинителот Владимир Милошевски за кого тврдат дека му е истечен мандатот и не може да биде застапник од ЈО за организиран криминал. Тој бил привремено распореден во Основното јавно обвинителство за организиран криминал и за корупција на 1 јуни 2016 година до 30 ноември лани кога му истекол мандатот.
На минатото рочиште одбраната побара изземање на обвинителот Владимир Милошевски од овој случај, бидејќи, како што рекоа, СЈО има предистражни дејствија за монтирање на случајот против Заев.
Јавното обвинителство за организиран криминал го одби барањето, а СЈО во соопштение појасни дека конкретно против обвинителот Милошевски не води постапка, но дека отворило постапка за истражување на сомневања за монтирање случај против Заев.
Заев и неговите адвокати бараа изземање на Милошевски, бидејќи, според нив, од политички мотиви тој е учесник во злосторничко здружување за да се монтира случајот „Поткуп“. Одбраната се сомнева дeкa токму Милошевски ја дал снимката од кабинетот на градоначалникот од која се гледа дека Зоран Заев од струмички бизнисмен наводно бара пари како противуслуга за издавање дозвола за градба.