Американската потпретседателка Камала Харис тргна кон Полска, јави Си-Ен-Ен. Харис не им се обратила на новинарите пред да се качи во авионот. Air Force Two го напушти Вашингтон пред малку и е на пат за Варшава, каде Харис планира утре да се сретне со раководството на земјата во обид да собере меѓународна поддршка и да го увери еден од најисточните сојузници на НАТО во поддршката од САД, објави телевизиската мрежа.
Но, нејзината мисија е комплицирана поради прашањето за авионите од советската ера, кои Украина ги бара за да ја одржи својата борба против Русија. Предлогот на Полска прво да се префрли сопственоста на авионите Миг-29 на Соединетите Држави ги фати функционерите на администрацијата на Бајден целосно неподготвени и беше отфрлен од Пентагон.
Харис ќе разговара за ова жешко прашање оваа недела, изјавија високи претставници на американската администрација пред нејзиното заминување.
„Неколку луѓе имаа различни идеи и мислиме дека сите вредат да се дискутираат и тоа е она што ќе продолжиме да го правиме“, рече еден функционер.
Во Варшава, Харис ќе се сретне и со бегалците кои побегнале од насилството во Украина, како и со американските дипломати кои се преселиле во Полска од американската амбасада во Киев.
Таа ќе отпатува од таму и во Романија, каде што е забележан прилив на мигранти кои бегаат од насилството во Украина.