Горан Мисовски, потпретседател на Собранието ги повикува пратениците на опозициската ВМРО-ДПМНЕ на средба викендов во Маврово на која, како што изјави за Нова, се очекува да дојдат до консензус за измени во Деловникот за кои пратениците имаат забелешки, а за да се подобри ефикасноста на Собранието.
Тој вели дека одлуката на опозицијата за блокада на Собранието не е во контекст на она за што претходно се договориле како ќе функционира законодавниот дом.
– Очигледно е дека не постоела координација помеѓу пратеничката група на ВМРО-ДПМНЕ со раководството на партијата. Опозицијата има право да предлага материјали до претседателот на Собранието согласно Уставот и Деловникот. Дали опозицијата ќе ја блокира работата на Собранието е нивна одлука. Наша обврска е да го применуваме Деловникот, вели Мисовски.
Тој објаснува дека од пред два месеци за овој викенд во Маврово е договорена средба под покровителство на претседателот на Собранието Талат Џафери со претставници на пратеничките групи, генералната секретарка и дел од собраниските служби, на тема Деловник за работа на Собранието.
Извршниот комитет на ВМРО-ДПМНЕ на вечерашната седница донесе одлука да ја блокира работата на Собранието од 10 мај до кога му даде рок на премиерот Димитар Ковачевски да се изјасни дали ќе се сретне со Христијан Мицкоски за да договорат датум за предвремени парламентарни избори. Најавите за блокада на законодавниот дом засега го оставаат отворено прашањето дали пратеничката група на ВМРО-ДПМНЕ ќе присуствува на средбата во Маврово, затоа што од партијата велат дека приоритетно е сега да договорат лидерска средба за предвремени избори.
– Ајде да одиме на избори, ако СДСМ не се плаши нека прифатат лидерска средба и да договориме датум, повторно повика Мицкоски денеска од Гевгелија.
Дарко Каевски, портпаролот на СДСМ, пак, го повтори ставот на партијата дека коалицијата е стабилна како и парламентарното мнозинство така што наредните парламентарни избори ќе бидат 2024 година и ќе бидат редовни.
– Ние сме на страната на граѓаните и носиме реформски и важни закони, ВМРО-ДПМНЕ е буквално на страната на опструкциите, блокадите преку кои сакаат да добијат политички поени, вели Каевски.
Од владејачкото мнозинство тврдат дека опозицијата ќе го блокира Законот за наставници и стручни соработници во основните и средните училишта. Со блокада на овој закон ќе бидат спречени вработувањае на околу 4.700 наставници и стручни соработници.
– Со години е блокиран Законот за изградба на нов Клинички центар во Скопје, инвестиција вредна 500 милиони евра. ВМРО-ДПМНЕ блокира подобри услови за лекување на граѓаните и подобри услови за работа на докторите. Пратениците земаат плата од граѓаните и таа плата треба да си ја заработат а не да прават штета, вели Каевски.
ВМРО-ДПМНЕ, како што обвинува владејачката партија, ќе го блокира и Законот на служба во Армијата кој обебзедува подобри услови за пензионирање и повисоки отпремнини за војниците.
С.М