Предлагачите на измените на Законот за културно наследство го повлекоа предлогот за кој денес требаше да се гласа во Собранието заради изградбата на коридорите 8 и 10 д. Археолозите непосредно пред почетокот на седницата преку протест предупредија дека пратениците ќе направат кривично дело доколку гласаат за измените оти со нив се озаконува уништување на културното наследство и се кршат низа домашни закони, меѓународни договори и ратификации.
Пратеничката група на ВМРО – ДПМНЕ најави дека тие нема да гласаат за дневниот ред, и се заканија со напуштање на седницата велејќи дека предложените измени ги добиле во петокот и имале кус рок да ги разгледаат.
И Маја Морачанин од ДОМ најави дека ќе гласа против измените оти треба да се носат на поинклузивен и потранспарентен начин со вклучување на експертката и академската фела.
По нивните забелешки претседателот на собранието Талат Џафери соопшти дека предлагачите ги повлекуваат предложените измени на Законот за заштита на културно наследство.
Археолозите на протест пред Собранието порачаа дека со кревање рака за законските измени пратениците ќе озаконат неповратно уништување на културното наследство. Повикаа да не дозволат надзорен инженер, кој нема познавања, образование и искуство од областа на заштитата на културно наследство да решава што е културно наследство. Рекоа дека на трасата на коридорите 8 и 10 д веќе постојат регистрирани археолошки локалитети и истакнаа дека свесно уништување на културното наследство е кривично дело.
Археолозите го повикаа претседателот на државата, МАНУ, универзитетите, сите засегнати институции, здруженија и граѓаните да се приклучат на апелот за повлекување на спорните законски измени пред да биде доцна.