Авион за итни медицински потреби полета од Германија за Русија за транспорт на лидерот на руската опозиција Алексеј Навални, кој од вчера е хоспитализиран и се наоѓа на интензивно лекување, откако претрпе претпоставено труење. Спасувачкиот авион бил испратен од Нирнберг во 3.11 часот, јави германскиот дневен весник „Билд“.
Руските лекари проценуваат дека состојбата на рускиот блогер и лидер на опозицијата Алексеј Навални во моментот е стабилна, но тешка, соопшти синоќа Министерството за здравство од регионот Омск, додавајќи дека специјалисти од Москва денеска ќе отпатуваат во Омск на продолжена консултација.
„Лекарите ја оценуваат неговата состојба во моментот како стабилна, но тешка“, се вели во соопштението на Министерството за здравство.
Според Министерството, се одржале телемедицински консултации со водечките федерални центри.
„Договорени се тактики на лекување и испитување“, се додава во соопштението, пренесено од руските медиуми.
Заменик директорот на болницата во Омск, во која Навални се наоѓа, Анатолиј Калиниченко одби да шпекулира со можната причина за болеста, изјавувајќи дека во моментот се спроведуваат истражувања, без наведување на дијагнозата.
„Тоа е најмногу што можам да ви кажам“, изјави Калиниченко во видеото емитувано на каналот TV Реин, близок до политичката опозиција во Русија.
Шефот на германска невладина организација соопшти дека берлинската болница „Charite“ е подготвена да го лекува Навални.
„Авионот, што се очекува да го доведе Навални од Омск до Берлин, полета со медицинска екипа“, изјави филмскиот продуцент Јака Бизил за ДПА, додавајќи дека успеале да ги добијат сите потребни одобренија за трансферот.
Навални се очекува денеска да пристигне на лекување во болницата „Charite“ во Берлин, а трошоците за летот и за лекувањето ќе бидат платени од приватни извори, додаде Бизил.
Германската канцлерка Ангела Меркел побара од Русија брзо разјаснување на околностите под кои се случило претпоставнеото труење.