Пратениците попладнево ја почнаа расправата по ребалансот на буџетот во второ читање предложен од Владата и Министерството за финансии. Расправата ја отвори пратеникот од ВМРО ДПМНЕ, Бојан Стојаноски, кој обвини дека прекројувањето на јавната каса дополнително ќе ја задолжи државата и ќе ги осиромаши граѓаните. Според него, буџетот од 4,37 милијарди евра, со кој дефицитот ќе се покажи за 180 милиони евра, не е развоен, а во него нема пари за ниту еден капитален проект.

„Цената на нафтата ја покачивте за 14 денари или со прост пример, ако едно семејство за да наполни резервоар од 60 литри, потребни му се повеќе од 800 денари или годишно само за гориво едно семејство треба да потроши 20.000 денари. Дополнително на ова ако го додадеме покачувањето на струјата од 7,3 отсто, тоа се вкупни само по овие две ставки близу 30.000 денари“, рече Стојаноски од собраниската говорница и додаде дека според проценките на Народната банка и ММФ, Македонија ќе има најнизок раст на еконимојата во регионот.

Пратеникот од СДСМ Диме Велковски  пак му реплицираше на Стојаноски дека само во сториот квартал од годинава извозот достигнал 763 милиони евра што е за 140 проценти повеќе од минатата година, или споредено пред пандемијата 27 отсто повеќе од 2018 година, а само во ТИРЗ за седум отсто е зголемен бројот на вработувања од почетокот на годинава. Според него, ова е добар показател дека економијата почнува да заживува.

„ Дали се согласувате сите студенти, од државните и од приватните универзитети да добиваат месечен надомест од 2400 денари? Дали се согласувате да се изградат 12 нови градинки до крајот на оваа година и да се распределат 17 милијарди денари повеќе од 2018 година за социјална грижа?“, ги праша Велковски пратениците од опозицијата.

На ова од ВМРО ДПМНЕ му одговорија дека ваучерите за студентите не се капителен проект, туку таков проект е изградбата на студентски град, ветување на СДСМ кое остана неисполнето.

Освнувајќи се на обвинувањето дека ребалансот на буџетот ќе удри по џебот на граѓаните, пратеничката Жаклина Лазаревска од СДСМ потсети дека во април 2016 година кога ВМРО ДПМНЕ беше на власт, потрошувачката кошничка изнесувала 500 евра, а просечната плата нешто над 350 евра, што преставува разлика од 150 евра. За разлика од тогаш, годинава во април потрошувачката кошничка изнесува 550 евра, а просечната плата 450 евра, или јазот е нешто помалку од 100 евра.

Расправата за ребалансот на буџетот ќе продолжи по паузата во 16 часот.

Со предложениот ребаланс на Буџетот приходите се проектирани на ниво од 222,6 милијарди денари и се за 4,7 отсто повисоки во однос на иницијалниот Буџет за 2021 година. Расходите се планирани на ниво од 268,8 милијарди денари или за 8,6 проценти повеќе во однос на иницијалниот Буџет. Дефицитот е позициониран во износ од 46,2 милијарди денари, односно 6,5 отсто од БДП.

Зголемување има и кај капиталните расходи за 6,5 милијарди денари и се проектирани на ниво од 30,5 милијарди денари.

Биљана Божиновска