Објект пред ТЦ „Мавровка“, на местото на кое пред два и пол месеца изгоре кафуле, ја доби првата плоча. Чаирскиот градоначалник Висар Ганиу по пожарот рече дека ќе следува реновирање на постоечкиот локал и уверуваше дека ќе нема тврда градба, но актуелната состојба на лице место не соодветствува со тогашните најави. И се чини дека нема да запре на тоа, со оглед на поставената арматура за столбови за нова подлога за втор спрат.
Она што се поставува како дилема е (не)легалноста на објектот. Ганиу, по несреќниот настан на почетокот на мај, истакна дека градежните зафати што ќе следуваат ќе бидат во насока на враќање на објектот во првобитната состојба пред пожарот, а пред само две недели за sdk.mk изјави дека таква дозвола е издадена од Општина Чаир. Меѓутоа наместо задржување на основно ниво, објектот сега добива на катност.
Градоначалникот на Чаир во таа прилика уверуваше дека објект на местото нема да се гради, дека повторно ќе биде кафуле, како што и беше и дека ќе биде така укажа дека и општинските инспектори излегле на терен и оти се постапува соодветно. Покрај градилиштето, „обвиткано со мрежа, не е поставена никаква табла на која би требало да биде истакнат кој е инвеститор, за каков тип на објект станува збор и на колку спратови ќе биде.
Постапувајќи по допрен глас од јавноста за нелегални градежни активности во реонот на ТЦ „Мавровка“, од страна на Директорот на БЈБ при МВР се преземени соодветни мерки и активности и издадена е усна наредба до Единицата за Економски и Компјутерски криминал (ЕЕКК) за утврдување на основи за постоење на елементи на кривично дело што се гони по службена должност.
„Откако се утврдени елементи што упатуваат на постоење докази за сторено кривично дело по чл. 244-а ,,Бесправно градење“ што се гони по службена должност, изготвено е Писмено известување до ОЈО Скопје и воедно се преземени активности за документирање и процесуирање на предметниот кривично-правен настан. Извршени се проверки во Општина Чаир, во Државниот Градежен Инспекторат, во Агенцијата за културно наследство и на ден 14 јули, полициски службеници од ЕЕКК во координација со УПС и Крим Техника излегоа на лице место со цел да се документира фактичката состојба. На лице место се затекнати двајца работници и едно лице кое се претстави како сопственик на предметната парцела, односно имот и кој што приложи соодветна документација, тврдејќи дека ја поседува целокупната потребна документација за градба. По документирање и откривање на наводите од предметниот кривично- правен настан по што ќе биде поднесен соодветен поднесок до ОЈО Скопје против сите сторители на кривичното дело што се гони по службена должност“ се вели во соопштението на Министерството за внатрешни работи (МВР).