Под мотото „Правда за Уставобранителите“ пред Владата вечерва се одржува најавениот протест за поддршка и правда за осудените за насилниот упад во Собранието на 27 април 2017 година. Граѓаните коишто протестираат извикуваат „Оставка“, „Никогаш северна, само Македонија“, „Ние сме гласот на патриотите“ и друго.
Според организаторите на протестот, организации и здруженија од дијаспората, обвиненијата за тероризам на осудените за „27 април“ се политички монтирани. Нивните барања се Врховниот суд да го поништи судењето и да има ново, бидејќи, како што тврди организаторот на протестот, имало лажни сведоци.
Протестот го поддржаа и од ВМРО-ДПМНЕ, а и претседателот на партијата, Христијан Мицкоски, како и партиски функционери, вечерва се меѓу протестантите.
Се очекува вечерашниот протест, според најавите на организаторот, да заврши пред Собранието.
Организаторите на протестот претходно апелираа учесниците да се придржуваат до протоколите за време на пандемија и се оградуваат од навредливи скандирања и транспаренти базирани на етничка и верска основа.
Вкупно 16 луѓе се осудени на затворски казни од над десет години за „27 април“, односно тие добија вкупно 211 години затвор за кривичното дело „терористичко загрозување на државниот поредок”. Амнестија добија 12 обвинети, меѓу кои и тогашните пратеници од ВМРО-ДПМНЕ и коалицијата, Крсто Мукоски, Сашо Василевски, Љупчо Димовски и Љубен Арнаудов.