Основното Јавно обвинителство Скопје поднесе Предлог за издавање казнен налог против вкупно 15 лица за кривично дело „непостапување според здравствените прописи за време на епидемија“ од член 206 став 1 од Кривичниот законик. Како што соопшти ЈОРМ, обвинетите на 31 мај не постапиле според прописите и наредбите со кои се определуваат мерки за сузбивање и спречување на ширењето на заразната болест Ковид-19.
„Иако со одлука на Владата било забрането групирање на повеќе од пет лица на јавни површини, тие се собрале на булеварот „Илинден“ во близина на зградата на Владата, каде учествувале на јавен собир под мотото „Стоп кршење права и слободи, стоп вакцини, стоп 5G антени, стоп лажна пандемија“. Обвинетите биле затекнати од полициски службеници при извршена контрола на местото на настанот“, се наведува во соопштението.
Надлежниот јавен обвинител, се додава, предложи на секој од обвинетите да му биде изречена парична казна од по 100 дневни глоби, при што висината на една дневна глоба да биде определена на 20 евра во денарска противвредност.
Едно лице беше приведено за непочитување на Уредбата и мерките за јавен собир и групирање по протестот пред Владата на 31 мај против начинот на државата за справување со ширењето на коронавирусот, против ваквините и против 5Г технологијата.
Педесетина граѓани се собраа пред зградата на Владата со транспаренти, знамиња, маски и чадори со сонцето од Кутлеш и изразија негодување со преземените мерки во борбата со ковид-19. Вирусот кој го парализира светот за нив е обичен грип за кој ниту има потреба од вакцина ниту, пак, има потреба од носење на заштитни ракавици и маски.