„Инста кафе“, како најбучен објект во реонот, и „Каза Кубана“ на Кеј добија решенија за преземање на мерки за намалување на нивото на бучава во животната средина. По добиените решенија, угостителите имаат законски рок од осум дена да постапат по истите, информираат од Општина Центар.
Добиените решенија се во рамките на спроведените акции во реонот на Дебар Маало и на Кеј „13 Ноември“ и мерењета на бучава од локалите во текот на изминатите два викенда.
Од Општина Центар посочуваат дека редовните контроли на терен за мерење на бучава од гласна музика од угостителски објекти на овластените инспектори за животна средина од Секторот за инспекциски работи се одвиваат во континуитет, секој викенд од месец јули, во соработка со стручните лица од овластената лабораторија за животна средина „Еуромак контрол“.
Дополнуваат дека усна опомена за почитување на граничните вредности за бучава добиле локалите „Папилон“, „Локал 45“ и „Харт Бар“ и апелираат до сите управители и сопственици на угостителски објекти во општината, да се придржуваат до постоечките правилници, да имаат обзир кон жителите кои живеат во непосредна близина на нивните локали и да се придржуваат до Законот за заштита од бучава во животната средина.
Во спротивно, како што велат, за сите измерени надминувања на граничните вредности на бучава, ќе се преземат законски пропишани мерки и ќе бидат изречени поригорозни санкции, во согласност со Законот за заштита од бучава во животна средина.