Посредникот на ОН во разговорите за прашањето на името меѓу Македонија и Грција Метју Нимиц закажа средба со преставниците на двете земји во Брисел на 11 и 12 декември.
– Средбата е дел од напорите на ОН зда им се помогне на двете страни да најдат заеднички прифатливо решение за прашањето на името, се наведува во соопштението од канцеларијата на Нимиц.
Првично разговорите беа планирани за наредната недела, но беа одложени и презакажани за декември.
Новата рунда разговори доаѓа во период на подобрена политичка клима меѓу Македонија и Грција, како и оптимистички очекувања од Скопје, Атина и Вашингтон за ставање крај на долгогодишниот спор.
Американскиот заменик помошник државен секретар Хојт Ји минатата недела на дебата во Вашингтон рече дека прашањето за името е досега на највисоко ниво и најблиску до изнаоѓање решение. Шефот на грчката диломатија Никос Коѕиас, пак, изјави дека очекува прашањето да биде затворено во првата половина на наредната година, а македонскиот премиер Зоран Заев, дека треба да се направи исчекор и оти сега има поголеми шанси од порано да се изнајде решение со Грција.
Следната недела на грчкиот министер за надворешни работи Никос Коѕиас ќе му кажам дека владата е подготвена за решавање на прашањето за името, изјави за 24 Анализа на ТВ 24 вицепремиерот за евроинтеграции Бујар Османи.
На прашањето дали владата ќе влезе во преговори околу изведените зборови од името- како употребата на придавката македонски – Османи вели – владата ќе преговара за сите прашања, штитејќи ги државните интереси.