Премиерите на Шпанија и на Данска пристигнаа во Киев за да се сретнат со украинскиот претседател Володимир Зеленски, соопштија нивните канцеларии.
По пристигнувањето во главниот град на Украина, шпанскиот премиер Педро Санчез и данската премиерка Мете Фредериксен се појавија заедно во кратко видео објавено на Твитер од официјалниот профил на Санчез.
„Украина ја има поддршката, солидарноста и посветеноста на Шпанија“, се вели во објавата.
Кабинетот на Фредериксен објави на Твитер дека таа и Санчез „ќе се сретнат со претседателот Зеленски за да и дадат конкретна поддршка на Украина“.
„Тие ќе се состанат за да разговараат за моменталната ситуација во Украина, понатамошната поддршка за Украинците и гонењето на воените злосторства и кршењето на човековите права во врска со руската инвазија“, се вели во соопштението од канцеларијата на Фредериксен.
Русија ги негира наводите за воени злосторства и тврди дека нејзините сили не гаѓаат цивили, но новинарите во Украина видоа докази од прва рака за злосторства на повеќе локации низ земјата.
Санчез претходно оваа недела најави дека Шпанија во наредните денови повторно ќе ја отвори својата амбасада во Киев, која ја затвори веднаш по руската инвазија на Украина на крајот на февруари.