Претседателот на Владата на Република Северна Македонија, Димитар Ковачевски на 16 и 17 мај 2023 година ќе учествува на четвртиот Самит на Советот на Европа во Рејкјавик, Исланд, соопшти владината прес-служба.
На Самитот ќе учествуваат претседатели на држави и влади на земји членки на Советот на Европа. Во рамки на Самитот, на 16 мај, претседателот на Вадата Ковачевски ќе учествува на Тркалезна маса на која ќе се разговара за моделите за зачувување и развој на демократијата во време на огромни ризици, а на која ќе учествуваат и претседателот на Европскиот Совет, Шарл Мишел, како и премиерите на Грузија, Норвешка, Италија, и претседатели и министри за надворешни работи на повеќе земји од Европа.
На 17 мај премиерот Ковачевски ќе има излагање на Генералната дебата на Советот на Европа, која овој пат е на тема „Обединети за Европа”, а каде се предвидени воедно и воведни обраќања на премиерката на Исланд Јакобсдотир, генералната секретарка на Советот на Европа, Пејчиновиќ-Буриќ како и претседателот на Парламентарно Собрание на Советот на Европа, Тини Кокс.
За време на престојот во Рејкјавик, планирано е претседателот на Владата да оствари средби и разговори со повеќе европски лидери.
Во состав на делегацијата која ја предводи премиерот Ковачевски е и Бојан Маричиќ, заменик на претседателот на Владата задолжен за европски прашања.