Премиерот Зоран Заев денеска соопшти дека годинава ќе користи десет дена летен одмор, но не сакаше да коментира дали Парламентот треба или не да оди на одмор за да се реализираат сите заостанати активноти пред пописот во септември и локалните избори во октомври.

– Значи, како што реков, социјалдемократ сум, правото на одмор е вистинско право, заради тоа што одморен човек и работник, па и пратеник, може да биде поефикасен. Можеби не мора цел август месец да биде одмор, обично после Илинден Парламентот заминува на одмор, можеби помалку, но Парламентот е над Владата, над мене како премиер. Јас не би си дозволил да ги коментирам нивните одлуки, како ќе одлучат тие ќе почитуваат. Но, јас ќе користам десет дена годишен одмор, рече Заев на новинарско прашање на настан во скопската општина Ѓорче Петров.

Инаку според Заев, воведувањето еколошка такса на горивата што е предвидено од 1 јули годинава ќе се компензира со тоа што се очекува да се укине воведената акциза од два денара на горивата. Иако се најавени блокади во Парламентот верува дека врз основа на дебата ќе се сфати колку е тоа драгоцено и важно.

-Еколошката такса се воведува во момент кога се укинува  акцизата од три денари што ја  донесовме за време на корона-кризата. Сега барел нафта е 596 долари, ако помине нафтата на берзите 600 долари, а се очекува да се случи деновиве, ќе се укинат и двата денари акциза, така што имаме едно компензирање со што акумулираме еден еколошки фонд, рече премиерот Заев.

Ако се донесе на почеток на јули, потсети, се  акумулираат 1,685 милијарди денари или за една година 3,330 милијарди денари, односно тоа се 55 милиони евра пари годишно само од оваа такса.  Дополнително, како што рече, ќе се слеваат средства во Еколошкиот фонд и преку проекти како што е оној најавен од Луксембур во Неготино за собирање на сметот при што сите приходи што ќе ги плаќаат комуналните претпријатија од 25 евра по тон за депонирање на сметот ќе одат во еколошкиот фонд, односно 14 милиони евра дополнителни средства.

-Убеден сум дека ваките работи што ги прави целиот свет, и навистина води грижа за граѓаните, за намалување на загаденоста на воздухот и севкупата заштита на животната средина и нашиот Парламент ќе го следи и иако се најавени блокади јас верувам дека врз основа на дебата ќе сфатиме сите колку е тоа драгоцено и важно, истакна Заев и Потсети дека секоја година има дебата во Скопје за загаденост на воздухот и како што рече,  да не зборуваме за се што треба да решиме од фабрики за  селекција на отпад, до фабрики за прочистување на отпадни води  и уште огромен број проекти ширум државата.