Комисијата за европски прашања, на која денеска требаше да се разгледуваат амандманите на Предлог- законот за употреба на јазиците е одложена.
Одложувањето не се поврзува со ставот на еврокомесарот Хан искажан за време на постетата на Скопје, дека овој закон не е приоритет за ЕУ агендата, туку дека претседателот на Комисијата АРтан Груби е на службено патување во Брисел.
Поднесени се 90 амандмани, од кои најмногу ВМРО-ДПМНЕ- 84, СДСМ четири, а БЕСА- два амандмана.
Од опозициската партија велат дека ќе се интервенира таму каде што сметаат дека се загрозува македонскиот јазик. Од СДСМ тврдат дека амандманите се заради расчистување на дилемите за законските казни, а БЕСА пак бара службена употреба, а не само унапредување на албанскиот јазик во Македонија.
Пратеничката група на ДУИ не поднесе амандмани, бидејќи забелешките ги доставиле до Венециската комисија. Предлог-законот е со европско знаменце, расправата трае три дена. Потоа повторно се враќа на пленарна, по што ќе следува финално изјаснување на пратениците по текстот.
Шаторите што вчера попладне пред Собранието ги постави здружението „Семакедонски Национален совет“ по неколку часа беа отстранети. Претходно, од здружението порачаа дека нема да си заминат оттаму сè додека не се повлече Предлог-законот за употреба на јазиците.