Правникот Џузепе Конте го прифати предлогот на претседателот на Италија Серџо Матарела да биде нов премиер на земјата, откако во минатата недела пропадна неговиот прв обид да состави кабинет. Се очекува Конте и министрите денеска да положат заклетва.
Матарела синоќа го повикал Конте во претседателската палата, по соопштението на популистичките партии, Движењето пет ѕвезди и десничарската Лига дека се создадени услови за политичка влада.
– Движењето пет ѕвезди и Лигата постигнаа договор за формирање политичка влада на чело со Џузепе Конте како премиер, се наведува во заедничкото соопштение на лидерите на М5С и Лигата, Лујџи Ди Мајо и Матео Салвини.
Согласно италијанскиот Устав, Матарела сега ќе мора да му го довери мандатот за формирање влада на Конте и да го одобри кабинетот што тој ќе го предложи.
Според италијанските медиуми, новата влада би можела да биде избрана уште денеска, односно 89 дена по одржувањето на параламентарните избори на кои ниту една партија или коалиција не обезбеди мнозинство во Парламентот.
Антисистемското Движење пет ѕвезди и десничарската попилустичка партија Лига и претходно постигнаа договор за формирање влада, но Матарела одби да го одобри предложениот кабинет, несогалсувајќи се со некои кадровски решенија, пред се со изборот на евроскептикот Паоло Савони за министер за економија, по што му довери мандат на Котарели да формира техничка влада.
Но тој во утврдениот рок не поднесе листа со министри.
Синоќа Котарели му го врати мандатот на италијанскиот претседател.
Според извори од М5С и Лигата, кандидат за министер за економија во новата влада ќе биде професорот на римскиот Универзитет „Тор Вергата“, Џовани Трија. Истите извори посочуваат дека во новиот кабинет Савони би бил министер за европски работи, а местото шеф на дипломатијата би го зазел Енцо Моаверо Миланези. Ди Мајо најверојатно ќе биде министер за индустрија, а Салвини за внатрешни работи.