Француските истражители денес го претресоа седиштето на организаторите на Олимписките игри во Париз во истрага за сомневање за корупција, според канцеларијата на националното финансиско обвинителство.
Организацискиот комитет на Париз во соопштението рече дека е во тек претрес во нивното седиште во предградието Сен Дени и дека „Париз 2024 соработува со истражителите за да ги олесни нивните истраги“.
Париз станува третиот по ред организатор на Летните игри вмешан во истрагите што ги водат антикорупциските власти во францускиот главен град.
Наводите за купување гласови поврзани со Олимпијадата во Рио де Жанеиро во 2016 година и Игрите во Токио во 2020 година претходно отстранија неколку членови на Меѓународниот олимписки комитет од таа организација.
Официјален претставник на канцеларијата на финансиското обвинителство денес рече дека претресите се поврзани со две прелиминарни истраги поврзани со Олимписките игри во Париз, кои претходно не беа објавени во јавноста.
Една од истрагите беше отворена во 2017 година кога Париз беше избран од страна на Меѓународниот олимписки комитет за домаќин во 2024 година, за сомневање за проневера на јавни средства и фаворизирање, како и загриженост за неодреден договор постигнат од организаторите на Париз, соопшти обвинителството.
Другата беше отворена во 2022 година по ревизија на Француската агенција за борба против корупцијата.
Обвинителството рече дека предметот е насочен кон сомнителен конфликт на интереси и фаворизирање што вклучува неколку договори постигнати од организацискиот комитет и Солидео, компанијата задолжена за олимписките објекти.
Олимписките игри во Париз се закажани за 26 јули до 11 август 2024 година.
Рациите се одвиваа во исто време кога извршниот одбор на Меѓународниот олимписки комитет започна дводневен состанок во Лозана, Швајцарија, во кој се очекува да ги пофали организаторите од Париз за нивниот напредок.
Претседателот на Меѓународниот олимписки комитет, Томас Бах, им рече на новинарите дека состанокот „секако ќе биде за Париз, каде што имаме добри вести по посетата на координативната мисија и по мојата посета на Франција, на претседателот Макрон, а исто така и на организацискиот комитет“.
Се очекува Меѓународниот олимписки комитет да даде изјава за рациите чија вест го обиколи светот попладнево.
извор: Асошиетед прес