Бразилските власти ги отстраниле повеќемесечните податоци за бројот на заразени и починати од коронавирусот од владината интернет страница по критиките кон претседателот Жаир Болсонаро за начинот со кој се справува со епидемијата. Регионалните здравствени власти ја обвинија Владата за „криење“ на точниот број на смртни случаи од коронавирусот.
Министерството претходниот ден престана да го објавува вкупниот број жртви од Ковид-19 во Бразил и го дава само бројот на починати во последните 24 часа, наведува „Би-Би-Си“, бидејќи Болсонаро кажал оти кумулативните податоци не ја даваат вистинска слика за состојбата во земјата.
„Авторитарниот, грозен и нехуман обид да се сокријат мртвите од Ковид-19 што се противи на етиката, нема да успее“, соопшти Националниот совет на министри за здравство откако службеник на Министерството за здравство изрази сомнеж во официјалните бројки.
Бразил се наоѓа на второто место во светот според бројот на заразени со коронавирус, а од неодамна има и најмногу смртни случаи на дневно ниво во споредба со сите други земји.
Во земјата досега се регистрирани над 670.000 заразени лица, а се верува дека оваа бројка е многу поголема поради недоволното тестирање. Бразил е на третото место во светот според бројот на починати од Ковид-19 со над 35.000 смртни случаи.