Српскиот претседател Александар Вучиќ ќе ја посети Украина на 11 јуни за да учествува на самитот Украина-Југоисточна Европа во Одеса, објави претседателскиот кабинет на Србија, пренесува Кијив Индипендент.
Еднодневната посета ќе ја означи првата официјална посета на пријателски настроениот српски лидер на Украина.
Се очекува највисоки претставници на 12 земји од југоисточна Европа да присуствуваат на состанокот во украинскиот град на брегот на Црното Море.
Србија се позиционираше како неутрална во војната меѓу Русија и Украина, стремејќи се да ја избалансира својата позиција како кандидат за ЕУ со своите долгогодишни односи со Москва.
Вучиќ, популистички политичар кој е на власт во Србија 12 години, беше еден од ретките европски лидери кои присуствуваа на прославите на Денот на победата во Москва на 9 мај, предизвикувајќи критики од ЕУ.
Традиционално топлите руско-српски врски беа затегнати неодамна откако руското разузнавање ги обвини српските одбранбени компании дека испорачуваат оружје на Украина преку посредници. Вучиќ ги негираше обвинувањата.
Никусор Дан, неодамна избраниот претседател на Романија, исто така ќе ја посети Одеса за да учествува на самитот, соопшти Кабинетот на романскиот претседател.
Претседателот Володимир Зеленски го покани Дан да ја посети Украина кратко откако тој победи на претседателските избори во мај. Дан се кандидираше на центристичка, проевропска платформа против крајно десничарскиот евроскептик Џорџ Симион.
Наспроти Симион кој гласно се спротивстави на воената помош за Кијив, Дан вети дека ќе го задржи проукраинскиот курс на Романија.
Албанија на Самитот ќе ја ретставува претседателката на парламентот Елиса Спиропали, објави РТШ. Пред две недели, за време на телефонски повик, украинскиот претседател Володимир Зеленски го покани премиерот Еди Рама на денешниот Самит.
Според грчка ТоВима, премиерот Киријакос Мицотакис денес, среда, 11 јуни, ќе учествува на 4-тиот самит Украина-Југоисточна Европа во Одеса, Украина, на покана од украинскиот претседател Володимир Зеленски. Намерата на Грција е да помогне во обновата на Одеса по нејзиното бомбардирање од страна на Русија; во обид да се обезбеди заштита на историскиот центар на Одеса, таа беше прогласена за светско наследство на УНЕСКО во јануари 2023 година.
Меѓу гостите на Саитот ќе бидат и премиерот на Хрватска Андреј Пленковиќ и претседателката на Молдавија, Маја Санду.
Како што дознава ЦивилМедиа, од Северна Македонија ќе присуствува вицепремиерот Изет Меџити, кој денес треба да оствари средба со Председателот на Украина, Володимир Зеленски.
Самитот се фокусира на тековната воена агресија на Русија против Кијив, суверенитетот на Украина и завршувањето на тригодишната војна. Присуствуваат претседатели, премиери и претседатели на парламенти од земјите од Југоисточна Европа, заедно со високи украински функционери.
Д. Мишев / ЦивилМедиа