Претседателски кандидат на движењето ЗНАМ, Максим Димитриевски смета дека земјава минува низ лоши процеси, а суштинските промени не се случуваат сами од себеси, туку мора да бидат поттикнати. Затоа тој одлучил како нов политички субјект, со неговите истомисленици да влезе во борба со цел државата да добие татко на нацијата, човек којшто ќе го обедини македонскиот народ и сите граѓани на Македонија. Тој во интервју за МИА нагласува дека е лесно да се седи настрана и оти тој сака да придонесе за промени во општеството, бидејќи, како што вели, во моментов тоа е креирано наменски да им служи на политичките елити, кои владеат 30 години.
- Мислам дека многу е лесно да седите од страна да ги набљудувате овие лоши процеси низ коишто поминува Македонија и едноставно решив да излезам од комфорната зона и директно да се вклучам во борбата. Суштинските промени во државата не се случуваат сами од себеси, туку мора да ги поттикнете. Направивме сондажи и анализи и влеговме како нов политички субјект, заедно јас со сите тие мои истомисленици во оваа борба да дојдеме до состојба Македонија да добие татко на нацијата.
Меѓу неговите заложби во делот на одбраната е зголемување на буџетот на Армијата со цел таа да биде подготвена, како што вели, да се справи со непријателите и внатрешните и тие од надвор. Државата вели се брани со народ, па затоа, доколку ја добие довербата од гласачите, во својство на Врховен командант, ќе се заложи за законска обврска со која секој граѓанин особено младите, машката популација да помине предвојничка обука.
- Црвени линии од кои нема отстапување кога е во прашање стратешкиот приоритет членството во ЕУ, вели се зачувување на достоинството на народот и консолидација преку градење национално единство и консензус за виталните национални интереси.
Според него, во континуитет албанските политички субјекти се обидуваат да наметнат теза за мултиетничка држава, а всушност создаваат еден феномен кој што се вика биетничко општество.
- Македонија не е општество на Македонците и Албанците и останатите, туку е општество на сите нејзини граѓани вклучувајќи го македонскиот народ и сите етнички заедници Албанците, Србите, Турците, Ромите, Власите, Бошњаците, Црногорците и сите оние коишто се во графата „други“ бидејќи се подеднакво граѓани. Сметам дека треба да се дадат еднакви права и еднакви можности на сите етнички заедници, а особено во делот на културната независност на сите тие етнички заедници.
Во однос на францускиот предлог, и уставните измени, Димитриевски смета дека тие се можни на база на реципроцитет и да се спроведат од моментот на стапување во полноправно ЕУ членство, заради самозаштита од нови, дополнителни барања од Софија.
- Македонија треба да ги прифати сите во својот Устав на база на реципроцитет, но дополнително истите уставни измени да се спроведат во целост од моментот кога Македонија ќе биде полноправна членка на Европската унија, вели, меѓу другото, претседателкиот канддат Максим Димитриевски во интервјуто за Медиумската информативна агенција.