Пријавувањето за упис во прва година на Универзитетот „Св. Кирил и Методиј“ во Скопје ќе се спроведе в понеделник и во вторник (31 август и на 1 септември). Прелиминарната ранг листа со резултати од успехот од средно образование ќе биде објавена на 3 септември, конечната ранг листа на 7 септември, а запишувањето на кандидатите ќе биде на 10 и на 11 септември.
Според Конкурсот за запишување на студенти во прв циклус студии за академската 2020/2021 година, што УКИМ го објави пред два месеца, на 23. факултети во негов состав се слободни вкупно 10.798 места. Од нив, 5.300 места се однесуваат на редовната квота т.е. кои се финансираат од буџетот на државата, 4.438 се однесуваат за кофинансирање на студиите и 1.060 слободни места има за вонредни студенти.
Надоместот за студии за редовни студенти останува ист како и во изминатите години – 200 евра во денарска противвредност, а за студентите со кофинансирање и за вонредни е 400 евра.
Поради пандемијата со Ковид-19, оваа година за првпат од воведувањето во 2007 година не се организираше државна матура. Матурантите добија диплома за завршено средно образование која ќе има важност на диплома за државна матура, училишна матура или завршен испит.
Во Конкурсот на УКИМ се наведени условите и критериумите за упис и начинот на бодирање за селекција на матурантите кои ќе бидат примени на факултетите, како и информации за потребните документи.
Вториот рок за пријавување на кандидати за прва година во учебната година 2020/21 на УКИМ ќе биде на 15 и на 16 септември, а третиот е на 28 септември на факултетите на кои ќе останат места.