Косовската полиција приведе 17 луѓе за време на прославата на Видовден, за „поттикнување омраза и носење облека со провокативна содржина“.
Сите полициски акции беа спроведени во соработка и координација со судските органи, според чија одлука еден осомничен е приведен поради основано сомнение за кривично дело нелегално поседување оружје, друг е обвинет за прекршок, четворица се ослободени, додека уште 11 се под истрага, се вели во соопштението.
Српската листа претходно објави дека косовската полиција привела повеќе од 15 Срби за носење на српското знаме или за носење „историски симболи“ на нивните маички. Според соопштението, официјална Приштина денес покажала дека „не ги почитува верските и граѓанските права на српскиот народ“.
Тие додадоа дека вршителот на должноста премиер на Косово, Албин Курти, ја „инструментализирал“ полицијата и дека целта била „да се заплашат и да се справат со Србите“.
Српската листа предупредува дека меѓународната заедница повеќе не може да остане тивок набљудувач на прогонот на еден народ. Молчењето за ваквите дејствија значи соучество во систематското угнетување на Србите во Косово, се наведува во соопштението.
Во Газиместан, кој се наоѓа на околу десет километри од Приштина, Срби од Косово, како и од Србија и земјите од регионот, се собраа за да го прослават Видовден, празник што ја одбележува битката против турската војска на Косово во 1389 година.