Сашо Тасевски, Ацо Ангеловски и Љупчо Јаневиќ кои на 27 април како дел од обезбедувањето министерот за внатрешни работи Оливер Спасовски, ги бранеа премиерот Зоран Заев и останатите пратеници од парламентарното мнозинство, добија признанија за посебен придонес во работењето на МВР. Признанијата им беа доделени во Штип каде што се прославуваше Денот на Полицијата.
По смената на власта, Тасевски беше назначен за началник на Одделот за обезбедување, или т.н. Шеста управа во МВР, Ангеловски беше поставен на чело на Секторот за превентивно обезбедување во МВР, а Јаневиќ началник на Единицата за обезбедување на Зоран Заев.
Многу е важно Македонија да ги професионализираме и да ги деполитизираме службите и да изградиме систем кој ќе ги осигура основните функции на полицијата независно од промената на политичките раководства на власт, рече премиерот Заев на одбележување на Денот на Полицијата. Тој кажа и дека новата цел треба да биде полициските и безбедносните служби да ги достигнат западноевропските професионални служби.
„Полицијата и МВР никогаш повеќе не смеат да бидат злоупотребени во политички цели заради оддржување на поединци на власт“ рече Заев.
Министерот за внатрешни работи Оливер Спасовски најави зголемување на платите на полициските службеници од 1 декември оваа година.
