Грчкиот премиер, Киријакос Мицотакис, изјави по завршувањето на Самитот на ЕПП во Брисел дека „верното спроведување на Договорот од Преспа е единствениот начин да се отвори европскиот пат на соседната земја“, нагласувајќи дека Северна Македонија има обврска да го користи името „Северна Македонија“ како што е предвидено во договорот.
Во исто време, премиерот на Северна Македонија, Христијан Мицкоски, пред почетокот на Самитот ЕУ-Балкан, ја објави изјавата: „Денеска сме во Брисел да испратиме порака дека македонските граѓани и Македонија како држава го заслужуваат своето место со останатите 27 земји членки на Европската Унија… ние споделуваме исти вредности и веруваме во тие вредности“.
Оваа изјава предизвика реакции во Грција поради непочитување на Договорот од Преспа, бидејќи се користени термини како „македонски граѓани“ и „Македонија“, што е во спротивност со обврските на Северна Македонија.
Грчките медиуми, како „Прототема“, го критикуваа Мицкоски за продолжување со „систематско кршење“ на Договорот од Преспа, нагласувајќи дека Грција постојано предупредувала дека непочитувањето на договорот ќе има последици за билатералните односи и европскиот пат на Северна Македонија. Истовремено, Мицотакис на Самитот ја изрази поддршката за европската перспектива на Србија и Албанија, но не ја спомена Северна Македонија.
Советот на ЕУ, пак, во заклучоците од средата потсети дека е важно да се имплементираат билатералните договори со добра волја, вклучително и Договорот од Преспа, како и договорот за пријателство и соработка со Бугарија. Бугарија, исто така, постави услов за Северна Македонија да ги измени својот Устав за да ги вклучи Бугарите во него, пред да даде зелено светло за почеток на пристапните преговори.