Во Кривичниот суд денеска треба да продолжи судскиот процес за случајот „Диво Насеље“, во кој 29 лица се обвинети за тероризам.

Обвинителството повика околу 40 заштитени сведоци, а се очекува дека голем број сведоци ќе има и одбраната.

Судскиот процес кој го води судјката Верка Петковска, започна на 9 февруари во Основниот суд Скопје 1. Обвиненитето товари 29 лица дел од таканаречената Кумановска група за тероризам и терористича организација за настаните поврзани со случувањата од 9 и 10 мај во Дива Населба во Куманово.

Кривичниот суд во декември лани одржа јавна седница за оценка на обвинителниот акт на која обвинителството и одбраната ги изнесоа своите аргументи во однос на обвинението.

Јавниот обвинител од Обвинителството за организиран криминал, Наум Пановски, презентирајќи го обвинението наведе дека по нападот на караулата Гошинце од 21 април 2015 година полицијата започнала обемна истрага и претреси кои се однесувале на лицата за кои постоело основано сомнение дека учествувале во нападот.

– На 9 мај припадниците на Единицата за специјални задачи постапувале по судска наредба за вршење на претрес во врска со сомнение за кривично дело тероризам, а во врска со нападот на караулата Гошинце. Приближувајќи се кон објектот, врз Единицата за специјални задачи била фрлена рачна бомба, при што биле поврдени дел од пoлицајците. Потоа групата продолжила да пука со автоматско оружје и снајпери, а борбите траеле цела вечер и другиот ден. Следниот ден вечерта групата била приведена, притоа 18 од нив носеле униформи на УЧК, образлоши обвинителот.

Сите 29 обвинети за кумановските случувања, пак, рекоа дека не се чувствуваат виновни. Според одбраната, која не негира дека имало вооружена група, предметот треба да се предаде на Специјалното обвинителство, бидејќи мотивот, како што велат, не е тероризам, а обвинетите се жртви на друго сценарио.

Во дводневната престрелка во кумановската населба Диво насеље загинаа осум припадници на македонската полиција и десет припадници на вооружената група. Според официјалните информации, меѓу загинатите се и Бег Ризај и Мирсад Ндрецај, кои исто така наводно биле едни од водачите на групата.