Слично како и случајот за сексуално малтретирање од страна на моќниот филмски продуцент Харави Вајнстајн, сега продолжуваат и обвинувањата против еден од најмоќните актери изминативе десетина години, Кевин Спејси.
Откако актерот Ентони Реп, пред „Базфид“ ја отвори тајната која ја чувал со години, дека на само 14-годишна возраст бил сексуално малтретиран од Спејси, на контото на оскаровецот дојдоа уште десетина обвинувања од мажи кои имале непријатен однос со него.
Си-Ен-Ен објави дека најмалку осум членови на екипата на популарната серија „Куќа од карти“ во која Спејси го глуми фиктивниот американски претседател Френк Андервуд, биле сексуално малтретирани од актерот. По обвинувањата на Реп, Кевин Спејси беше обвинет и од актерот Роберто Кавазос како и од продуцентот Тони Монтана.
Она што отвори полемика во јавниот дискурс уште повеќе е начинот на кој Спејси „ги отфрли“ првичните обвинувања од актерот Реп.
„Немам зборови да опишам колку сум ужаснат од приказната. Не се сеќавам на моментот кој ако се случил, бил пред 30 години. Но ако навистина сум го направил она што тој вели, му должам најискрено извинување бидејќи можно е да се случило во длабока и неприфатлиа пијана состојба и жалам за чувството кое го носел со себе сите овие години“, рече Спејси меѓу другото кој потоа надополни дека сега сакал да го продолжи животот отворено како хомосексуалец.
Поранешен асистент продуцент на серијата „Куќа од карти“, го обвини Спејси дека без никаква согласност, додека се возеле во автомобил, ја ставил рака на несоодветно дел од ногата на асистентот, кој пак тврди дека Спејси веројатно сметал дека му е тоа дозволено со оглед на моќта со која располагал во филмската екипа.
„Тој беше на многу моќна позиција во серијата а јас некој кој што е многу доле во синџирот“, вели асистентот за Си-Ен-Ен.
„Не се сомневам дека таквиот стил на предатор за него било само рутина и дека сигурно и други го имале истото искуство со Кевин кој располагаше со висок статус и позиција. Се работи за токсична средина во која младите мажи неизбежно беше а да немаат контакт со него“, вели тој.
И продукциската компанија на серијата „Куќа од карти“, Ем-Ар-Си, потврди дека во 2012 добиле поплаки за однесувањето на Спејси.
„За време на нашата прва година од работењето во 2012 година, некој од екипата се пожали за одредено недолично однесување од Кевин Спејси. Презедовме итни мерки и брзо ги средивме работите на задоволство на сите инволвирани. Спејси учествуваше во тренинг-програма по која никој друг потоа не се пожали од него“, велат оттаму.
По првичните обвинувања од актерот Ентони Реп кон Кевин Спејси, Нетфликс, кој ја издава серијата, соопшти дека „Куќа од карти“ повеќе нема да се снима.