Генерален штрајк или радикални протести најавуваат Синдикалните организации по неуспешните преговори со Владата за усогласување на платите во јавниот сектор.
Од Конфедерацијата на слободни синдикати, велат оти членовите се разочарани, манипулирани и потценети од страна на власта.
„Испративме допис до Владата не добивме одговор. Вчера бевме во Министерството за информатичко општество. Наместо министерот не прими државниот секретар и неговите советници. Ни рекоа кажете кои се вашите барања, ние не можеме да одлучуваме. Ете тоа е односот на Владата со синдикатите. Од час и половина состанок, ние еден час и петнаесет минути слушаме за кризите кои се случуваат во државата“, рече на прес конференција претседателот на КСС, Благоја Ралповски.
Исплатата на минимална плата под законски предвидениот минимум во повеќе дејности, дополнително го разочара членството на Синдикатите, вели Ралповски и најавува радикализација на синдикалното делување. Дали тоа ќе биде генерален штрајк или масовни протести, членството допрва ќе одлучува.
Критики имаат и за Законот за административни службеници, кој по скратена постапка влезе во Собранието.
„Тој закон не носи ништо добро, само по 100 до 200 денари за покачување на платите во јавнот сектор. Манипулацијата е голема, се манипулира со 5, 6 до 10.000 работници. Се работи за 100.000 работници, кои не можат да земат повисока плата доколку Владата не донесе одлука за зголемување на бодот. Ги повикуваме сите пратеници да застанат на страната на работниците, да ја сопрат оваа манупилација и да не дозволат еден ваков потценувачки закон да помине во Собрание“, додава Ралповски.
Реакција за Законот за административни службеници стигна и од пратеничката група на ВМРО-ДПМНЕ. Оттаму велат дека така како што е скроен, Законот предвидува покачување на платите само за една група работници во јавниот сектор, но не за сите.
„Токму затоа, пратеничката група на ВМРО-ДПМНЕ поднесе амандман кој имаше за цел усогласувањето со минималната плата да биде предвидено за сите категории вработени според Законот за административни службеници. Но за жал, мнозинството предводено од СДСМ и ДУИ, едногласно го одби“, рече на денешната прес конференција пратеничката на ВМРО-ДПМНЕ, Ели Панова и додаде дека со овој амандман се предвидувало линерано покачување на платите на сите вработени во јавниот скетор за 2800 денари.
Предлогот за линеарно покачување на платите доби поддршка и од Сојузот на синдикати на Македонија и од Синдикатот на УПОЗ.
Инаку, гранковите синдикати кои делуваат во состав на КСС, Синдикатот за администрација и државна управа, Синдикатот за транспорт и врски, Синдикатот за станбено, деловно, комунални организации, Синдикатот на полиција и Синдикатот за енергетика минатата недела излегоа на предупредувачки протест пред Собранието.
Утре пак со прекин на работниот процес од 10 до 12 часот своето незадоволство ќе го изразат вработените во управата и правосудството, а од понеделник генерален штрајк почуваат вработените во образованието.
(Б.Божиновска)