Единаесет полицајци и еден новинар денес беа повредени во текот на протестот на албанската опозиција која бара оставка на министерот за внатрешни работи Фатмир Џафај бидејќи според нив, тој е замешан во шверцот на дрога.
Новинар близок до опозициската Демократска партија исто така беше повреден во главата пред зградата на министерството за внатрешни работи, пишува агенцијата АФП која се повикува на нивниот дописник од Тирана кој бил сведок на насилството.
Во Тирана денес протестираа илјадници луѓе на повик на опозицијата.
Опозицијата бара оставка и од премиерот Еди Рама. Демонстрантите фрлаа јајца и камења врз министерството. Полициски кордон го спречи влезот на демонстрантите во зградата.
Опозицијата трвди дека министерот Џафај го штити својот брат Агрон, осуден во отстуство во 2012 година во Италија на 7 години затвор поради шверц на дрога и дека братот на министерот и понатаму продолжува со нелегални активности. Опозицијата објави снимка на која се слуша дека човек, за кој тврдат дека е Агрон, разговара со шверцери.
Обвинителството отвори истрага а снимката е пратена во Италија на вештачење. Министерот вели дека ќе даде оставка доколку се утврди дека гласот на снимката е на неговиот брат.
Лидерот на опозицијата Љуљзим Баша го обвини премиерот дека работи во договор со актери од организираниот криминал и дека ја турнал земјата во сиромнаштија.
Во 2017 година Социјалистичката партија на Еди Рама победи на изборите и го почна вториот мандат на чело на Албанија. Земјата е членка на НАТО и се надева дека годинава ќе отвори преговори за членство со ЕУ.