„Цивил“ – Центарот за слобода со мирен протест пред Собрание денеска побара оставка од Владата поради како што велат оттаму, неуспехот да го спроведе договорот за надминување на политичката криза.
Според „Цивил“, терминот за предвремени избори мора да се помести најмалку до крајот на септември затоа што не се создадени услови за слободни избори на 5 јуни 2016 година.
– На Македонија и се потребни итни и суштински зафати во судството, пред се, во поглед на воспоставување и непречено функционирање на специјално одделение во Кривичниот суд кое ќе се занимава со предметите кои произлегуваат од работата на Специјалното јавно обвинителство. Воедно, мора да се создадат услови за ослободување на медиумите од партискиот диктат, но и администрацијата, стопанството и општеството во целост, изјави првиот човек на организацијата Џабир Дерала.
Како што напоменува тој, државата и понатаму не е одвоена од партијата, а владејачките партии продолжиле со злоупотребите, политичката корупција, кршењето на човековите права и слободи, политичката дискриминација и структурното насилство.
Според Дерала продолжуваат партиските притисоци, закани и уцени врз гласачкото тело, пред се, врз социјално ранлиците категории на граѓани, како и врз вработените во администрацијата на локално и национално ниво.
Тој ја потенцираше и улогата на Специјалното јавно обвинителство и опструкциите кои се вршат кон ова тело и смета дека судството, вклучително и Уставниот суд, се под партиски диктат.