Стотици српски националисти се собраа во главниот град Белград и побараа владата да го отфрли планот на Западот за нормализирање на односите со Косово и да се повлече од преговорите, јавува агенцијата Анадолија.
Демонстрантите се собраа пред претседателската палата носејќи плакати на кои пишуваше „Косово е срцето на Србија“, „Нема предавање“ и „Предавството на Косово е предавство кон Русија!“.
Тие го блокираа сообраќајот и во еден момент ја срушија металната ограда до претседателството и се приближија до зградата извикувајќи: „Каде е Вучиќ“.
Групата потоа фрлала јајца кон прозорците и се заканувала дека ќе го убие српскиот претседател Александар Вучиќ, а полицијата потоа приведе некои од нив.
Нивното главно барање беше Вучиќ да се повлече од косовските преговори со западните земји и да не се формира Заедница на српски општини.
Вучиќ за еден локален ТВ канал изјави дека демонстрантите повикуваат на насилство и прашал што мислел Дамијан Кнежевиќ кога и рекол на владата: „Се плашите од немири. Ви се колнам дека сме подготвени на повеќе од ова“.
„Дали навистина мислите дека е можно, дали мислите дека нема да има одговор на ова? Државата ќе реагира многу ефикасно, многу брзо, многу сериозно и многу одговорно“, рече Вучиќ, обвинувајќи ги демонстрантите дека се антисрпски и дека добиваат средства и поддршка од „странска земја“.
Тој додаде дека сите оние кои се закануваат дека ќе го убијат и ветуваат немири доколку Белград се обиде да ги подобри своите врски со Косово, ќе одговараат во согласност со законот.
„Оние кои мислат дека можат да ја урнат Србија со своите невистини, со своите брутални лаги, оние кои мислат дека можат да урнат сериозна земја со закани, со малку оружје, со врските што ги имаат во некоја странска земја, со поддршката што ја добиваат во пари, најмногу во кеш од некои странци и се правдаат со голем патриотизам, а бидејќи прават многу добри работи за својата земја, никогаш не можат да ја победат Србија“, рече Вучиќ.
Главниот обвинител на Белград, Ненад Стефановиќ, рече дека секој што ќе се заканува на највисоките владини функции и сите членови на екстремистички групи кои ја загрозуваат безбедноста на граѓаните ќе бидат кривично гонети.
Европската унија бара Косово и Србија да постигнат конечен договор за решавање на прашањата меѓу двете земји.
Од неодамна, двете земји водат разговори кои се познати како француско-германскиот предлог. Според тој предлог, Косово треба да дозволи и создавање на Заедница на српски општини во северниот дел на земјата, каде што живеат многу Срби.
Претставниците на ЕУ се надеваат дека ќе ги завршат преговорите за планот напролет.