Неколку стотина Албанци, меѓу кои и ветерани на ОВК, утринава го блокираа патот со багери и шлепери кај селото Трнава кон селото Бањица во општина Србица, а во Трнава се слушнале истрели, објави српската државна телевизија РТС.
Станува збор за рутата по која српскиот претседател Александар Вучиќ требаше денеска да помине. Патот бил блокиран и со неколку камиони. Демонстраните носеле транспаренти против посетата на Вучиќ на Косово.
Општината Србица е целосно населена со Албанци, а во селото Бањица се наоѓаат околу 300 српски куќи.
Српскиот претседател, коментирајќи ги протестите изјави дека „работите треба да се решаваат со зборови и ум, а не со оружје“.
– Уште посилно сум определен за зачувување на мирот и српските институции и народот на Косово, додаде Вучиќ во Косовска Митровица.
Тој утринава ја продолжи својата посета на Косово со обиколка на Клиничкиот болнички центар во Косовска Митровица. Потоа ќе ја посети локацијата за проектот на населбата Сончева долина, а ќе ги посети и Србите во селото Бањица.
Попладне ќе им се обрати на косовските Срби на собир во Косовска Митровица, што ќе биде централен настан за време на неговата дводневна посета на Косово.
Вучиќ не може во Дреница од безбедносни причини
Косовскиот премиер Рамуш Харадинај претпладнево објави дека ја повлекол дозволата дадена на српскиот претседател Алекдандар Вучиќ за посета на регионот Дреница, јави МИА од Приштина.
– Безбедноста на граѓаните е над се. Ја повлеков дозволата издадена од Министерството за надворешени работи за посета на српскиот претседател на регионот на Дреница. Одлуката стапува на сила веднаш, објави Харадинај на Фејсбук.
Одлуката на Харадинај уследи по протестот на неколку стотици ветерани на Ослободителната војска на Косово и жители на Скендерај (Србица) и другите населени места од регионот, кои со камиони и дрва го блокираа патот низ кој треба да помине Вучиќ за да го посети тамошното село Бање, населено со Срби.
Според медиумите, повеќето од демонстрантите се вооружени, а се слушнале и истрели од огнено оружје.
Вучиќ ја коментираше изјавата на Меркел во Скопје
Вучиќ вчера ја посети браната на езерото Газивода, од каде ја започна дводневна посета на српските заедници во Косово. Тој рече дека длабочината и тежината на несогласувањето меѓу Србите и Албанците најдобро може да се види на тоа место, особено што токму неговата вчерашна посета беше овозмоѓена со интервенција на меѓународната заедница, бидејќи косовските власти не дозволуваа.
– Браната Газивода е изградена во 1981 година, и е од голема важност за Србите и Албанците.Поголем дел од Метохија добива вода од тука, како и Приштина во текот на летото. Езерото е од големо значење за нас, бидејќи без Газивода нема преживување на луѓето во Ибарски Колашин и Зубин Поток, рече Вучиќ.
Тој додаде дека Србија инвестирала речиси 128 милиони динари во реконструкцијата на браната Газивода и најави дека до крајот на септември ќе бидат обезбедени уште 12 милиони динари за таа намена
На прашање на новинари за негативниот став на германската канцеларка Ангела Меркел за идејата за разграничување, Вучиќ рече дека неговата сила е минимална во споредба со неа, но дека ќе стори се за решавање на косовскиот проблем.
Тој во ово контекст упати прашање до неа, зошто ваквата идеја не важела во 2008 година, кога Косово било одвоено од Србија, а сега во 2018 кога станува збор за територија на Косово, би важела.