Синоќа, со  камења и бекатонски плочки биле искршени стаклата од влезот на партиското седиште на СДСМ во Гостивар. Според СВР Тетово, искршени се  три стакла со димензии од 130 х 200 сантиметри. Полицијата проверува дали и овој напад е поврзан со изразеното  незадоволство од донесениот Закон за јазици.

Изминатите денови неколку десетици лица протестираат пред домовите на пратеници од СДСМ, бидејќи гласале за Законот за јазици. Собири имаше пред домот на Кети Смилевска, пратеничка од Прилеп. Демонстрантите извикуваа „Предавник“.

Група луѓе се собраа и пред домот на велешкиот пратеник Панче Иванов. Во Делчево, полицијата пронашла расфрлени летоци со навреди за пратеникот на СДСМ од оваа општина.

Од МВР велат дека синоќа немало посериозни инциденти и дека и натаму се преземаат мерки согласно безбедносните проценки. Полицијата и натаму ќе ги обезбедува домовите на дел од пратениците од власта.

Ноќта, по усвојувањето на Законот беше запален автомобилот на пратеничката на СДСМ од Виница Славица Шуманска – Митева. Таа  тогаш потврди  дека изминатиов период добивала закани.

-Имаше закани по пораки, ама ни на сон не верував дека ќе се случи вакво нешто. Очигледно имаат храброст, ама не им се плашам. До сега се така функционираше, но ова е кукавички чин, не е во ред да прават вака среде ноќ. Ова е чист вандализам – изјави Митева.

Полицијата се уште нема осомничени за овој настан.