Над 2.000 граѓани попладнево протестираа во центарот на Ниш и побараа враќање под надлежност на градот на аеродромот „Константин Велики“ и оставка на градоначалникот и на градскиот совет, кои вчера донесоа одлука аеродромот да и биде подарен на владата.
– Бараме Собранието на градот Ниш да не ја прифати и да поништи одлуката за пренос на аеродромот која е донесена од градскиот совет и членовите на ова тело и градоначалникот да поднесат оставка, наведоа демонстрантите пред канцеларијата на градоначалникот на Ниш.
Според Милош Бошковиќ, еден од организаторите „целта на овој протест е да испрати јасна порака дека Нишлиите нема да ја толерираат оваа ароганција на централната и на градските власти. Фактот што Владата доби легитимитет на изборите не значи дека може да прави она што ќе и падне на ум и да не го слуша гласот на своите граѓани”. Ова нема да помине, констатираше Бошковиќ.
Протестот, кој започна во 17 часот, заврши со скандирање „Оставки, оставки” и „Чиј е аеродром- Наш е аеродромот”, а демонстрантите фрлаа хартиени авиони кон зградата во која се наоѓа седиштето на градоначалникот на Ниш.
За во недела, е закажано продолжување на протестите на истото место, во исто време со истите барања.
Министерството за градежништво, транспорт и инфраструктура денеска, непосредно пред протестот, најави дека ќе продолжи да инвестира во опремата и развојот на нишкиот аеродромот „Константин Велики”, бидејќи има намера аеродромот да биде центар на воздушниот сообраќај во целиот регион.
Оттаму додаваат дека без инвестициите на Министерството и Владата на Србија, градот Ниш немаше да има таков аеродром и зголемен број на патници.
Министерката за сообраќај Зорана Михајловиќ изјави дека бројот на патниците на нишкиот аеродром е 248 пати поголем откако Владата на Србија вложува пари во него.
“Владата нема да дозволи аеродромот во Ниш да ја доживее судбината на бројни нишки државни фирми што пропадна и што ни ги остави Зоран Живковиќ, Демократската партија и другите партии што од неа настанаа”, изјави таа.
Градскиот совет во Ниш вчера донесе одлука за отстапување на аеродромот „Константин Велики” на централната власт.
Оваа одлука треба да биде одобрена од страна на Собранието на градот на првата наредна седница.