https://www.youtube.com/watch?v=7jeqaq8uBKE
Околу 300.000 луѓе протестираа во Романија , од кои 150.000 само во Букурешт, поради одлуката на Владата донесена во вторникот во утринските часови со која што ја декриминализираше злоупотребата на службена положба.
Според декретот донесен во 3 по полноќ, секоја злоупотреба на службена положба за проневера на помалку од 44.000 евра од јавните пари нема да има можност да се казни со мерка затвор.
Ова предизвика бурна реакција кај граѓаните на Романија кои денеска излегоа низ улиците во повеќе градови.
Тие сметаат дека овој закон е донесен по мерка на некои политичари кои би сакале да се спасат од одговорност за проневерите кои што ги имаат направено и дека претставува поткопување на Националниот директорат за анти-корупција.
Директоратот во изминативе три години има поднесено 1170 обвиненија за случаи кои ја оштетиле државната каса за преку една милијарда евра.
Главната обвинителка на Националниот директорат, Лаура Ковеси смета дека овој декрет влијае врз една третина од нејзините обвиненија.
Против законот се произнесе и претседателот на Романија, Клаус Јоханис кој смета дека Владата го погребала владеењето на правото.