Десетици илјади граѓани се приклучија на четвртиот протест на албанската опозиција во главниот град Тирана. Демонстрантите бараат оставка на премиерот Еди Рама и да се одржат слободни и фер избори .
Демонстрантите се собраа пред канцеларијата на премиерот во 18,30 часот. Тие фрлаа петарди и молотови коктели кон владината зграда.
Лидерот на опозицијата, Лулзим Баша, го повика премиерот Рама да поднесе оставка и да го отвори патот за формирање на преодна влада која би организирала слободни и фер избори. Тој го обвини Рама за криминал и корупција, дека ја киднапирал Албанија и го блокирал патот кон Европската унија.
Говорот на Баша беше прекинат од солзавец испукан по обидот на дел од демонстрантите да се доближат до вратите на зградата. Баша ги повика демонстрантите да се воздржат од судири со полицијата.
Премиерот Рама на социјалните медиуми напиша дека е многу тажен за она што опозицијата и го прави на државата. Тој додаде дека молотовите коктели не можат да и наштетат на Владата, но штетат на земјата.
Претседателот на Албаија Илир Мета ги повика и демонстрантите и полицијата да се воздржат од судири и насилни дејства.
Опозицијата го напушти парламентот во февруари и организира протести на кои бара оставка на Рама.
Тие ја обвинуваат владата за изборен фалсификат на изборите во 2017 година.
Албанија треба да одржи локални избори кон крајот на јуни, на кои опозицијата одбива да учествува.