Илјадници луѓе и натаму протестираат по улиците на повеќе градови низ цела Америка незадоволни од изборот на новиот претседател Доналд Трамп. Во некои градови протестите излегуваат од контрола, демонстрантите ги блокираат патиштата, а полицијата постојано е на терен. Во Портланд дојде и до престрелка во која е ранет еден маж, јавува СНН.
Ова е веќе четврта вечер како бројни Американци протестираат, а како што стојат работите, протестите ќе продолжат и во наредните денови.
Се протестира и во Њујорк каде бесните демонстранти во еден момент дојдоа пред кулата на Трамп, познатото здание од 58 ката во центарот на Менхетен.
Новоизбраниот претседател смета дека ова што му се случува не е чесно.
„Штотуку имав успешни претседателски избори. Професионални демонстранти кои ги „набуцкаа“ медиумите протестираат. Тоа не е чесно“, објави Трамп на Твитер.
Подоцна се обиде да ги омекне демонстрантите со друга тактика и напиша дека му се допаѓаат малубројните демонстранти кои покажале страст за земјата и дека сите заедно ќе работат да бидат горди на Америка.
Меѓу градовите во кои се протестира се Лос Анџелес, Орландо, Чикаго, Бостон, Денвер и многу други.
Како причина за протестите воглавно се наведуваат ставовите на Трамп за имигрантите, правата на ЛГБТ лицата и друго.