Ријасетот на Исламската Верска Заедница (ИВЗ) донесе низа мерки за намазот на Фитр Бајрам што треба да се спроведат во секоја џамија на 24 мај, пишува Реисот Сулејман Реџепи на својот Фејсбук профил.
Во образложение на одлуките донесени денеска, Реисот Реџепи пишува дека сабах намазот (утринската молитва) е одлучено верниците да ја прават дома, односно апелира повеќе да се користат дворовите на џамиите за правење на молитвите. Дел од мерките што верниците од исламска вероисповед треба да ги почитуваат во тек на молитвата за Рамазан Бајрам, ИВЗ ги има донесено и на 7 мај кога одлучи да ги отвори џамиите по два месеца пауза.
„Правењето на намазот на Фитр Бајрам да не биде подолго од 15 минути, максимално да се избегнат поздравите со физички контакт, откажување од посета на гробишта, за време на Фитр Бајрам, традиционалните посети треба да бидат што е можно помалку, дезинфекција на џамии, задолжително носење маска, чистење раце со средство за дезинфекција при влезот во џамијата или да се носи ракавици, секој верник треба да има лично сеџаде“, се вели во одлуката на ИВЗ.
Од таму воедно се истакнува дека меѓу верниците треба да се запази физичката дистанца колку што е можно повеќе, односно е забранет престој во групи пред или по молитвите во џамијата. Поради сегашната состојба со коронавирус, Ријасетот на ИВЗ ја откажа организацијата на традиционалната централна манифестација по повод Фитр Бајрам.