Специјалното јавно обвинителство соопшти дека е донесена прва правосилна пресуда за предмет што го води ова обвинителство.
„Во предметот „Таргет-Тврдина“ е раздвоена кривичната постапка за едно лице, за кое, врз основа на признание на вина, на 17 ноември е донесена пресуда. На обвинетото лице му е изречена алтернативана мерка-условна осуда за кривичното дело Помагање на сторител во извршено кривично дело“, се вели во соопштението од СЈО.
Предлогот за раздвојување, како што се додава, бил истакнат од страна на СЈО, при што се имал предвид интересот на обвинетото лице за побрзо завршување на постапката, како и економичноста и целисходноста на постапката.
Во случаите „Таргет“ и „Тврдина“, кои се споени во еден обвинителен акт, првообвинети се поранешниот директор на Управата за безбедност и контраразузнвање (УБК), Сашо Мијалков, ексначалникот на петтата управа, Горан Грујовски, поранешниот шеф на кабинетот на Мијалков, Тони Јакимовски, и уште десетина лица. Тие се товарат за незаконското прислушување, што пред две години го разоткри тогаш опозициската, а сега владејачка партија – СДСМ, и за уништување на опремата од прислушувањето.