Талибанците одржаа прес-конференција откако во неделата влегоа во Кабул и воспоставија контрола врз целата држава. Портпаролот на талибанците Забихула Муџахид, истакна дека никој нема да биде повреден и оти не сакаат проблеми со меѓународната здница.

„Сакавме да запреме пред портите на Кабул, но претходната влада се покажа толку некомпетентна, што мораше да влеземе и да ја обезбедиме сигурноста на жителите, да спречиме хаос и грабежи. Имаме право да дејствуваме според нашите верски начела. Авганистанците имаат право на свои сопствени правила и регулативи во согласност со своите вредности. Посветени сме да ги штитиме правата на жените во рамките на шеријатското право. Тие ќе работат и учат рамо до рамо со нас и нема да има дискриминација. Тие ќе бидат многу активни во нашето општество“, кажа Муџахид.

Муџахид кој за прв пат се појави во јавноста рече дека не сакаат веќе да има војни во Авганистан и дека им простиле на сите кои се бореле против нив.

„Нема да има одмазди, никој нема да биде испрашуван и прогонуван. Гарантираме безбедност во целата земја, нема да има киднапирања и непријателства. Сакаме младите да останат во земјата, не сакаме никој да си замине“, рече Муџахид и додаде дека многу работи ќе бидат појасни откако ќе се формира влада.

Авганистанското тло нема да се користи против други држави“, кажа Муџахид откако беше прашан за можното присуство на Ал Каеда во земјата.

Прес-конференцијата на талибанците ја пренесуваше Би-Би-Си.