Утрово околу 8:40 часот, малолетник влегол во основно училиште „Владислав Рибникар“ во центарот на Белград и почнал да пука од пиштол, пренесуваат „Новости“.
На лице место пристигнала полиција и брза помош. Неофицијално, пет деца се повредени. Полицијата не дозволува влез во улицата која води кон училиштето. Напаѓачот бил приведен.
Според дел од српските медиуми во инциденот е убиен член на обезбедувањето на училиштето.
Четворица ученици се пренесени во болница и се во стабилна состојба и не им се загрозени животите. На терен се голем број екипи на брзата помош и полицијата.
Ученикот пукал од пиштол, за кој се верува дека го донел од својот дом.
На местото на настанот пристигнале и контрадиверзантски екипи, бидејќи во една училница бил пронајден ранец во кој имало пиштол и неколку шишиња со запалива течност. Засега не се знае кој го донел тој ранец.
Се уште се чека на официјална потврда за бројот на загинати и ранети.
На теренот излегле седум возила на брза помош, пренесува „РТС“.