Рускиот претседател Владимир Путин објави дека Русија има развиено и тестира нова линија нуклеарно оружје кое би можело да ја надмине американската одбрана.
Во телевизиско обраќање, Путин покажа видео и анимации на нуклеарни ракети, подводни беспилотни летала и друго оружје за кое рече дека Русија го развила како резултат на американското повлекување од договорот против балистички проектили од 1972 година потпишан со Советскиот Сојуз.
“Тогаш не ја слушавте нашата земја”, рече Путин. “Слушајте сега.” Некои од оружјата веќе ги тестиравме, додаде тој.
Во годишното обраќање во рускиот парламент, Путин изјави дека Русија развила нова, нуклеарно-крстосувачка ракета со “неограничен” опсег која може да ги избегне системите за воздушна одбрана. Тој, исто така, рече дека Русија развила “непобедлива” ракета со боева глава со хиперсонична брзина.
Воената реторика на Путин следува по објавата од Пентагон за нова политика за нуклеарно оружје и ветувањето на американскиот претседател Доналд Трамп дека ќе развие оружје “толку силно и моќно што ќе ги одврати сите агресивни дејства”.
Според руските медиуми, новата хиперсонична интерконтинентална балистичка ракета може да лета 6.800 милји и има носивост од 15 боеви глави. Руското Министерство за одбрана соопшти дека спровело успешно тестирање во октомври, при што проектилот отпатувал 3.600 милји пред да стигне до целта, на далечниот исток на Русија.
Путин тврди дека развивањето на новото оружје е дефанзивно .
“Ние никогаш не сме имале намера да напаѓаме никого”, рече тој. “Русија само ќе се одмазди ако биде нападната“.