На денешната седница на Комисијата за политички систем и односи меѓу заедниците пратениците донесоа заклучок за формирање работна група за изготвување амандмани за Законот за пратеници и за Законот за плати на избрани и именувани лица, а во врска со намалување на патните трошоци.

Пратеничката група на СДСМ и коалицијата предлага патните трошоци од 30 отсто да се намалат до 20 отсто од цената на литар гориво за секој изминат километар.

Претседателот на Комисијата за политички систем, пратеникот од СДСМ Александар Кирацовски кажа дека во оваа работна група би требало да учествуваат пратеници, членови на ова собраниско тело, од сите пратенички групи вклучувајќи ја и опозициската ВМРО-ДПМНЕ и тие би требало да ги усогласат ставовите во врска со намалувањето на средствата за патни трошоци на народните избраници и избраните и именуваните лица.

ДУИ, според Реџаил Исмаили, ќе ја поддржи потребата за донесување на измените на законите што предвидуваат намалување на патните трошоци на пратениците и другите избрани и именувани лица, но кажа и дека размислуваат дали да поднесат амандман, како што најави неговиот колега Џевад Адеми вчера, за целосно укинување на патните трошоци.

-Има многу функционери, посебно директори кои останаа на функциите, аздисано ги трошат парите на ист начин како што работеа претходно. Вчера бев кај една директорка, да не ја именувам, таа за неколку месеци потрошила 20.000 денари за бензин додека нејзиниот заменик 110.000 а и двајцата живеат во Скопје. Се продолжува со истиот начин, рече Илија Николовски од СДСМ.

Според него, за запрепастување е фактот што пратениците земале патни трошоци без патни налози.

Тој потсети дека во Република Македонија има 5.000 државни станови, најмногу во Скопје и оти поголем дел од нив се празни, а становите во зградата кај Железничката станица се задржани од поранешни функционери или не сакаат да си ги откупат.