Владата денеска на седница ја разгледа инфомацијата за формирање работна група која ќе ги разгледува евентуалните можности да се прошири опфатот на ранливите потрошувачи на струја во Програмата за заштита на ранливите потрошувачи на енергија. За таа цел, Владата задолжи неколку институции да формираат Работна група која ќе ги разгледува овие можности.
– Владата ги задолжи Министерството за транспорт и врски, Министерството за здравство, Управата за јавни приходи и Министерството на финансии и се укажува на Регулаторна комисија за енергетика, ЕВН ХОМЕ, и Електродистрибуција, да номинираат по еден член и заменик член во Работната група, а Министерството за труд и социјална политика да номинира членови и заменици членови кои имаат пристап до бази на податоци потребни за работата на Работната група да ги достават потребните информации до Министерството за економија како ресор носител на иницијативата, соопштија од Владата.