Во Собранието на Република Северна Македонија денеска се одржа 5. работна средба на Работната група за учество на Дијалогот Жан Моне во полн состав, на покана од претседателот на Собранието Талат Џафери, кој е и координатор на оваа Работна група.
Како што информираат од собраниската прес-служба, на денешната средба на Работната група учествуваа потпретседателите на Собранието, Горан Мисовски и Хусни Исмаили, координаторите и претставниците на пратеничките групи од СДСМ, ВМРО ДПМНЕ, ДУИ, НСДП, АЛТЕРНАТИВА, Алијанса за Албанците, БЕСА и претседателот на Комисијата за деловнички и мандатно имунитетни прашања. На средбата беше присутен и надворешниот експерт, Јетон Шасивари и претставници од стручната Служба на Собранието.
„Присутните на средбата работеа по претходно утврдениот начин на работа, со продолжување на разгледување на членовите од Член 166 до крајот на Деловникот, паралелно со предлог Деловникот изготвен од Службата. Средбата се одвиваше со конструктивен придонес на сите присутни. Работата се прекина со заклучок на претседателот дека наредната работна средба ќе биде закажана во втората половина на месец јануари во новата 2023 година“, посочуваат од собраниската прес-служба.
За текот на работата на оваа средба, како и при секоја средба на Работната група за учество на Дијалогот Жан Моне, од Собрание велат дека до европратениците Шидер, Валсман и Ќучук ќе биде пратен Записникот од средбата на Групата.