Решението за проблемите во односите на Бугарија со Северна Македонија лежи во имплементацијата на Копенхашките критериуми за членство во ЕУ и во почитувањето на човековите права. Затоа, повеќе не треба да се зборува за „бугарско вето“, бидејќи има јасен заклучок на Европскиот совет од јули годинава и договорена преговарачка рамка, вели бугарскиот претсдеател Румен Радев во интервју за грчката новинска агенција АНА-МПА.
– Тоа се европски, а не бугарски барања, кои јасно кажуваат дека Република Северна Македонија мора да го измени својот устав за да им даде можност на Бугарите да имаат уставна заштита и еднакви права со тоа што ќе бидат вклучени во уставот на еднаква основа со другите државотворни нации во земјата. Треба да се искорени јазикот на омразата и насилството врз Бугарите, и да се почитува и заштити бугарското културно и историско наследство, истакнува Радев.
Бугарскиот претсдеател изразува недеж дека државниот врв во Скопје што побргу „ќе ги прифати европските принципи и вредности за подобра иднина на граѓаните на Северна Македонија, како и за создавање подобра перспектива за сите на Балканот“.
Радев во интервјуто за АНА-МПА нагласува и дека Бугарија и Грција се стратешката оска на стабилност која создава можности за одржлив развој и раст на целиот регион.
– Двете земји не се само соседи, туку пример како на Балканот може да се надминат проблемите од минатото и да се градат стратешки односи врз основа на европските принципи и вредности, изјави шефот на бугарската држава.